Аргалийн тоо толгой өсчээ
Дэлхийн байгаль хамгаалах сангийн Монгол дахь хөтөлбөрийн газар,
Увс нуурын ай савын улсын тусгай хамгаалалттай газар нутгийн Хамгаалалтын
захиргаа, "Гулзатын санаачилга" ТББ хамтран энэ сард аргаль хонины
тооллого хийжээ.
Цагаан шувуут уулын дархан цаазат газар, Цагаан гол орчим, Мандахын аараг, Хүрэмийн нуруунд тооллого хийхэд 1541 аргаль бүртгэгдсэн байна. Үүний 797 нь хонь, 314 нь угалз, 310 нь хурга бол 120-ынх нь нас, хүйсийг тогтоож чадаагүй аж. Одоогоос хоёр жилийн өмнө хийсэн тооллогоор энэ бүс нутаг1046 аргальтай байсан бол түүнээс хойш тоо толгой нь өссөн үзүүлэлттэй гарчээ. Мөн Увс аймгийн Бөхмөрөн сумын нутагт хар сүүлтийн тооллого явуулахад 119 хар сүүлт бүртгэгдсэн байна.