Монгол Улс “Ай Ти Би Берлин-2015”-д түнш орноор оролцоно
2014
оны 03 дугаар сарын 05-наас 08-ны өдрүүдэд ХБНГУ-ын Берлин хотноо зохион
байгуулагдаж буй “Ай Ти Би Берлин” олон улсын аялал жуулчлалын үзэсгэлэн болон
“Берлиний олон улсын эдийн засгийн конгресс-2014” хурал зөвлөгөөнд Соёл, спорт,
аялал жуулчлалын сайд хатагтай Ц.Оюунгэрэл, Соёл, спорт, аялал жуулчлалын яамны
Төрийн нарийн бичгийн дарга П.Алтангэрэл тэргүүтэй төлөөлөгчид тус улсыг зориод
байна.
Монгол Улс уг арга хэмжээнд 1999 оноос хойш албан ёсоор, төр хувийн хэвшлийн хамтарсан зохион байгуулалттай тогтмол оролцож ирсэн юм. Үүнтэй холбогдуулан Монгол Улсын Засгийн газрын 183 дугаар тогтоолын дагуу Монгол Улс ХБНГУ-ын Берлин хотод 2015 оны түнш орноор оролцох 2 талын гэрээнд гарын үсэг зурна.
“Ай Ти Би Берлин” олон улсын үзэсгэлэн 2014-т Монголын аялал жуулчлалын компаниуд, тур оператур болон агаарын тээврийн компаниуд оролцож байгаа бөгөөд 2012 онд тус үзэсгэлэнд нийт 187 орны аялал жуулчлалын байгууллага, 94 орны 7000 гаруй сэтгүүлч, хэвлэл мэдээллийн байгууллагын төлөөлөл оролцон, үзэсгэлэнгийн үйл ажиллагааг сурталчилжээ.