Нийслэлийн Аялал Жуулчлалын Газраас нийслэл Улаанбаатар хотод гадаадын зочин жуулчинг хүлээн авах, “Найрсаг Улаанбаатар”-ын төлөө идэвхтэй үйл ажиллагаа явуулах зорилгоор Аялал жуулчлалын Guide төвтэй хамтран “Хотын аяллын хөтөч бэлтгэх сургалт”-ыг 2013 оны 10-р сарын 5-наас зохион байгуулж эхлээд байна. Тус сургалтаар монгол ёс заншил, өв уламжлалаа бүрэн танилцуулах чадвартай, нийслэл хотоо эерэгээр сурталчилж чадах ур чадвартай, гадаад хэлний мэдлэгээ батжуулан хөгжүүлэх авъяастай мэргэшсэн хөтөч тайлбарлагчдыг бэлтгэх хөтөлбөрийг хэрэгжүүлж байна. Эхний ээлжийн сургалтанд 25 суралцагч хамрагдаж байгаа ба нийслэл хотынхоо түүхэн дурсгалт газруудаар аялах, жуулчдын сонирхон үздэг музейнүүдэд тайлбар хийх, хотод зохион байгуулагддаг эвэнт арга хэмжээнүүдийг танилцуулах, тэдгээрт газарчлах, хотын ногоон бүсийн орчинд байрлах жуулчны бааз руу газарчлах дадлага хичээлүүдийг тусгай хөтөлбөрийн дагуу явуулж байна. Мөн жуулчдад учирч болзошгүй аюул ослын үед эмнэлгийн анхны тусламж хэрхэн үзүүлэх, тэдний эрүүл мэндэд харшлахааргүй хоол хүнс, ундыг бэлтгэх ба сонгох, монгол зан заншил, өв уламжлал, түүх соёлоо хэрхэн гадаад хэл дээрээ тайлбарлан таниулах тухай хичээлийн хөтөлбөрүүдийг зохион байгуулж байгаа юм. Цаашид  Guide төвтэй хамтран тус сургалтыг үргэлжлүүлэн дахин 4 удаагийн элсэлт зохион байгуулахаар төлөвлөж байна. Дараагийн хоёрдугаар ээлжийн сургалт 12 дугаар сарын 1-нд эхлэх юм.