Хүүхэд бүрийн хүсэл мөрөөдлийн гүүр болж, тэднийг эрүүл саруул өсөн хүмүүжихэд нь гол үүрэг гүйцэтгэдэг Олон улсын хүүхдийн “Найрамдал” зуслангийн 35 жилийн ой энэ жил тохиож байгаа билээ. Найрамдал төв ойгоо угтаж  МЗХ-ны “Залуучуудын Аялал Жуулчлалын Хөгжлийн Төв”-тэй хамтран  “Хүүхэд насанд хүргэж өгдөг галт тэрэг ... ирлээ” тусгай ээлжийн амралтын үйл ажиллагааг 2013 оны 5 дугаар сарын 3-6, 24-27-ны өдрүүдэд зохион байгуулах гэж байна. “Улаанбаатар-Найрамдал-2013” тусгай галт тэргээр  хүүхдийн вант улсад 3 хоног зочлон хүүхэд насандаа эргэн очиж, эрүүл зөв амрах ховор боломжийг 40 хүртэлх насны залуучуудад олгож байгаагаараа онцлог юм. Эхний ээлж 5-р сарын 3-6-ны хооронд бөгөөд үүнд 40 хүртэлх насны 200 орчим залуу хамрагдах боломжтой аж. Түүнчлэн та хүүхэд насны дурсамжаа сэргээж, орчин үеийн хүүхдийн зуслангийн үйл ажиллагаа болон амьдрах орчинтой танилцаж, цөөхөн хэдхэн хоногийг ч гэсэн амраж өнгөрөөхийг хүсвэл МЗХ-ны дэргэдэх “Залуучуудын аялал жуулчлалын хөгжлийн төв”-д хандах юм байна.