Төрийн түүхийн музейн 100 мянга дахь зочин маргааш тодорно
Маргааш 11 цаг 40 минутад Төрийн
түүхийн музейд зочилсон 100 мянга дахь иргэн тодорно. Ардчилсан Үндсэн хууль
батлагдсаны 20 жилийн ойг угтан өнгөрөгч оны нэгдүгээр сард Төрийн түүхийн
музей анх нээгдсэн билээ. Монгол улсад хосгүй үнэт хэмээн бүртгэгдсэн 612
бүтээлийн 289 нь эл музейд тавигдсан байдаг ба нийт 970 орчим биет үзмэр, 16
цахим үзмэрээр сан хөмрөгийг бүрдүүлжээ. Музейд Монгол төрийн ёслолд хэрэглэж
байсан болон хэрэглэж байгаа сүлд, туг, далбаа, тамга, дууллыг хүндэтгэлтэйгээр
залсан байна.
Хубилай хааны зарлигаар 1270-аад онд бүтээсэн “Арван буянт номын цагаан түүх” зохиолд дурдсан “Хаан төрийн есөн их бэлгэ”, VIII Богд Жибзундамба хааны зарлигаар 1915 онд бичигдсэн “Зарлигаар тогтоосон Монгол Улсын хууль зүйн бичиг”-т заасан “Олноо өргөгдсөн Монгол Улсын төрийн долоон эрдэнэ”, “Төрийн хан хуур” зэргийг байрлуулжээ.
Эзэн Чингис хааны өлгий нутгаас авчирсан хөрс шороо, рашаан усны дээж, Чингис хааны Алтан ургийнхны бүтээн дээдэлж ирсэн хаадын овгийн тамганууд зэрэг олон зуун жил төрөө дээдлэн шүтэж ирсэн уламжлалыг илтгэх эд зүйлсийг эндээс үзэх боломжтой юм байна.