Мазаалайг хамгаалахад 180 сая төгрөг зарцуулна
2013 онд мазаалай баавгайд зориулан
улсын төсвөөс Цагаан бургас гэдэг газар байгуулсан “Мазаалай баавгайн
үржүүлгийн төв”-ийг тогтвортой ажиллуулах төлөвлөгөө, стандартыг боловсруулах,
боловсон хүчнийг бэлтгэхэд 60 сая төгрөг зарцуулахаар болжээ. Мөн тус
үржүүлгийн төвд шинээр лаборатор байгуулж, шаардагдах тоног төхөөрөмжөөр
тоноглоход зориулан 120 сая, нийт 180 сая төгрөгийн хөрөнгө оруулахаар
төлөвлөөд байна.
Амьтан, ургамал хамгаалах үндэсний хорооны нарийн бичгийн дарга В.Цогтбаатар “Мазаалай баавгайд зориулан 2008-2012 онд улсын төсвөөс нийт 14.3 сая төгрөг зарцуулсан бөгөөд голлон нэмэлт хоол тэжээл тавихад зориулсан. Нэмэлт нь голдуу хорголжин тэжээл байдаг. Үүнээс гадна багсармал тэжээл, нохойн болон махан хоол нэмж өгдөг юм. Ерөнхийдөө мазаалйг хавар ичээнээс гарахад, гантай жилд намар ичээнд орохоос нь өмнө тэжээл тавьдаг юм. Түүнчлэн Харри Эвердсон ахлагчтай “Говийн баавгай” судалгааны баг 2008 оноос өөрсдөө хөрөнгө цуглуулж, нийт 311 сая төгрөг зарцуулсан” гэв.