Тэрбээр Монголын түүх, соёлын дурсгалаар ихээхэн ашиг олж буй бөгөөд дахин үзмэр авахаар ирэхэд нь манай тал гэрээгээ зөрчсөн хэмээн хүсэлтээс татгалзсан байна. Гэтэл тэрбээр өмнө нь явуулсан манай үзмэрийг барьцаалан “Шинээр үзэсгэлэн гаргах дурсгалууд иртэл энэ үзмэрүүд энд байж байг” гэж тулгаж буй юм билээ.

Барьцаалсан үзмэрүүдийн дунд Дорноговь аймгийн нутгаас олдсон XIII зууны үеийн түүхийн хосгүй үнэт дурсгалд тооцогдох эмэгтэй хүний занданшуулсан шарил, дагалдах хэрэгсэл болох бортгон малгай, толгойн гоёл зэрэг зүйлс бий гэнэ. Манай холбогдох яам, хуулийн байгууллагынхан хамтран тэдгээр найман үзмэрийг барьцаалан “Тарбозавр батаар”-ын хамт авчрах ажлыг зохион байгуулж буй сурагтай.

Дашрамд дурдахад, “Тарбозавр батаар”ыг эх орондоо авчирсны дараа Төв аймгийн нутаг, Богд хан уулын өвөрт динозаврын музей байгуулахаар төлөвлөж буйгаа Соёл, спорт, аялал жуулчлалын сайд Ц.Оюунгэрэл мэдэгдсэн билээ. Тэнд Эрик Жон Прокопигийн гэрээс олдсон, Монголоос аваачсан 4-5 үлэг гүрвэлийн араг яснаас гадна Япон руу хуулт бусаар гаргасан динозаврын 5-6 чулуужсан ясыг тавих гэнэ. Цаашлаад Өмнөговь, Дундговь аймагт ч үлэг гүрвэлийн музей байгуулахаар  төлөвлөсөн аж.