Хүйтний эрч дахин хасах 45 градуст хүрнэ
Манай орны ихэнх нутгаар өнөөдрөөс эхлээд хүйтний эрч дахин
чангарахыг Цаг уур, орчны шинжилгээний газраас анхааруулж байна. Сүүлийн хоёр
хоног хүйтний эрч харьцангуй суларч байсан ч өнөөдрөөс томоохон голуудын сав
газраар дахин хасах 45 градус хүрэх юм байна. Өнөө шөнө зүүн зүгийн нутгаар,
8-нд нутгийн төв болон зүүн хэсгээр бага зэргийн цас орно. Энэ сарын 7-11-нийг
хүртэлх цаг агаарын урьдчилсан мэдээгээр 8, 9-нд зүүн зүгийн нутгаар салхи секундэд 14
метр хүрч ширүүсэх төлөвтэй. Ихэнх хугацаанд Увс нуур, Дархадын хотгор, Идэр,
Тэс, Халх голын сав газраар шөнөдөө -45 градус, өдөртөө -29-34 градус, Хангай,
Хөвсгөлийн уулархаг нутаг болон Хараа, Ерөө, Туул, Хэрлэн, Онон голын сав
газраар шөнөдөө -37-42, өдөртөө -23-28 градус, бусад нутгаар шөнөдөө -29-34,
өдөртөө -18-23 градус хүйтэн байна. Энэ долоо хоногийн сүүлчээр хүйтний эрч бага
зэрэг сулрах аж.