Нисэхийн цагаан хаалга
Энэ хаалгыг 1957 онд ЗСБНХУ-ын Дээд зөвлөлийн дарга К.Е.Ворошиловыг Монгол улсад айлчлан ирэхийг угтаж босгосон ажээ. Ирсэн зочин бүхэн буян амлаж, сайхан сэтгэл өвөрлөн ирж байхыг бэлгэдэн Цагаан хаалганы цаад талбайг Буянт-Ухаа хэмээн нэрлэжээ. Домогт өгүүлснээр, Урьд цагт энэ ухаагийн энгэр дээр олон адуу бэлчээрлэн явснаас нэгэн ухаа хонгор зүсмийн охин унага унтаад хоцорчээ. Түүнийг нэгэн ядуу хүн олж тэжээснээс хойш тэр айл олон ухаа хонгор адуутай болон баяжжээ. Тэр үеэс эхлэн энэ газрыг Буянт-Ухаа хэмээн нэрлэсэн гэдэг.