Увс аймгийн музей нь 1948 онд Гэгээрлийн хэлтсийн дэргэд 1 хүний орон тоотой, шашны сэдэвт 300 орчим үзмэртэйгээр байгуулагдсан. БНМАУ-ын Соёлын яамны сайдын 1971 оны 4 дүгээр сарын 26-ны өдрийн 101 тоот тушаалаар "Аймгийн музей" болон өргөжсөн. Эдүгээ 2734 дэсийн 5700 гаруй үзмэртэй. Увс аймгийн байгаль, түүх-угсаатны зүй, орчин үе, маршал Ю.Цэдэнбал гэсэн дөрвөн танхимтай. 2006 онд Монгол Улсын баатар, маршал Ю.Цэдэнбалын 90 насны ойгоор түүний түүхэн замналыг харуулсан танхимыг дэглэн тавьж музейн үзмэрийг өргөтгөсөн. Тус музей жилд гадаад, дотоодын жуулчид, хөдөлмөрчид, хүүхэд залуучууд нийлсэн 7000 – 8000 хүнд үйлчилдэг. Ойрад түмний олон арван үеийн арвин баялаг түүх, соёлын өвийг хамгаалах, цуглуулах, хадгалах үйл ажиллагаа явуулдаг. 

• Маршал Ю.Цэдэнбалын танхим: Монгол улсын нам төрийг 44 жил удирдсан, ХХ зууны манлай улс төрч, Монгол Улсын баатар, Хөдөлмөрийн баатар, Маршал Ю.Цэдэнбалын бага идэр нас, нам төрийн албанд ажиллаж байсан түүхэн замналыг харуулсан.
• Байгалийн танхим: Увс аймгийн нутаг дэвсгэрт буй ургамал, ан амьтан, жигүүртний төлөөлөл, Увс нуурын ай сав газрын Дархан цаазат газар, Шүдэн уулын давс, чацаргана, мөнх цаст хайрхануудын тухай өгүүлдэг.
• Түүх-угсаатны танхим: Түүх соёлын үл хөдлөх дурсгалууд, олон ястнуудын ялгаа ба онцлогуудыг харуулсан угсаатны эд өлгийн зүйлс, тод үсгийн дурсгал, Ойрадын их хаан Галданбошигтын угийн бичиг, Хойдын Амарсанаагийн хөө хуяг, Далай хааны эдлэл хэрэглэлүүдийг харуулдаг.
• Шашин, орчин үеийн танхим: Увс аймгийн 1925 оноос одоо хүртэлх үүсэл хөгжил, тус аймгаас төрж гарсан алдартнуудын тухай танилцуулна.

Зун цагийн хуваарь: 5-р сарын 20-ноос 8-р сарын 31-нд Даваа – Баасан гарагт 08:00 – 12:00, 13:00 – 17:00 
Өвөл цагийн хуваарь: 9-р сарын 1-нээс 5-р сарын 20-нд Даваа – Баасан гарагт 08:30 – 12:00, 13:00 – 17:30

Тасалбарын үнэ:

• 0-18 насны хүүхдэд үнэ төлбөргүй
• Насанд хүрэгсэд 3000 төгрөг
• Гадаадын иргэн 5000 төгрөг
• Үзмэрийн танхимд зураг авахад нэг танхимд 5000 төгрөг
• Видео бичлэг хийхэд нэг танхимд 10000 төгрөг.

Хаяг:  Увс аймаг, Улаангом хот, 7-р баг, Маршал Ю.Цэдэнбалын гудамж, 24
Утас: 7045-5899, 7045-4831
FB: Uvs Aimgiin Muzei