1992 оны 7 дугаар сард Морин хуурын чуулга байгуулах тухай Засгийн Газрын тогтоол гарч, 1993 оны 1 дүгээр сард Хөгжим бүжгийн дунд сургууль дээр байрлаж, чуулгын бүрэлдэхүүнээ тогтож, бэлтгэл сургуулилтаа эхлэн тус оны 4 дүгээр сарын 16-нд анхны тоглолтоо хийж үзэгч түмэндээ Морин хуурын чуулга гэдэг байгууллагыг танилцуулжээ. 1994 оны 6 дугаар сарын 1-нээс Засгийн Газрын шийдвэрээр Ц.Намсрайжавын нэрэмжит Улсын филармоны бүрэлдэхүүнд оржээ. Тус чуулга төрийн ёслол хүндэтгэлийн том арга хэмжээнүүд, концерт, тусгай арга хэмжээ, “Алтан намар”, “Морин хуур” зэрэг дуу хөгжмийн наадмуудад байнга оролцохын зэрэгцээ уран сайхны болон баримтат кино, жүжгийн олон арван бүтээлүүдийг тоглохоос гадна Ардын Жүжигчин, Төрийн шагналт С.Гончигсумлаа, Ардын Жүжигчин, Төрийн хошой шагналт Л.Мөрдорж, Б.Дамдинсүрэн, Н.Жанцанноров, Урлагийн Гавъяат Зүтгэлтэн, Төрийн шагналт Б.Шарав, Төрийн шагналт З.Хангал, Ц.Чинзориг, Ц.Нацагдорж, Урлагийн Гавъяат Зүтгэлтэн Г.Алтанхуяг, Д.Баттөмөр, залуу хөгжмийн зохиолч Б.Мөнхболд, Х.Алтангэрэл, Д.Түвшинсайхан болон Ж.Бизе, Дж.Пуччини, П.Чайковский, А.Дворжак, А.Хачатурян, Хэ Жин Хау, Чен Кай зэрэг сонгодог болон монголын орчин цагийн хөгжмийн зохиолчдын шилдэг бүтээлүүдийн урын сантай болжээ. Өнөөг хүртэлх 20 жилийн хугацаанд монголын болон дэлхийн сонгодог хөгжмийн зохиолчдын 1000 гаруй бүтээлийг тоглосон байна.

1996 оны 2 дугаар сард ОХУ-ын Улаан-Үд хотод 24 уран бүтээлчтэй айлчлан тоглолт хийснээс гадна 40 гаруй удаа гадаадад уран бүтээлээ толилуулж, Хятад, Орос Япон, Солонгос, Америк, Франц, Канад, Турк, Макао, Австри, Герман, Итали, Тайвань зэрэг орны дэлхийд алдартай тайзан дээр тоглосны дотор Япон улсад 20 удаа уригджээ. Чуулгын дотор 1993 онд “Чэлүгэн” морин хуурын дөрвөл, 1997 онд “Ятгын дөрвөл” хамтлагууд байгуулагдаж бие даасан тоглолт хийж уран бүтээлээ толилуулжээ. Чуулгын 30 гаруй уран бүтээлчдийн дотор Монгол Улсын Ардын Жүжигчин 2, Монголын Улсын Соёлын Тэргүүний Ажилтан 20 орчим байдаг.

 
Хаяг: Сүхбаатар талбай, Соёлын төв өргөөний хойд талын аркаар, Улсын филармоний байранд
Утас: 99138428